Regularo de la Literatura Komitato de SAT

1. La literatura Komitato havas kiel taskon, laŭ lingvo kaj stilo kontroli la de SAT, LEA-oj aŭ eĉ privataj personoj publikigotajn verkojn.
2. Manuskriptoj estu kontrolataj nur tiukaze se eldonisto garantias ilian aperon.
3. Antaŭ ol decidi, ĉu verko povas esti kontrolata, okazu prova kontrolo ampleksanta 10-20 paĝojn.
4. La poŝta forsendo de la manuskriptoj okazu ĉiam registrite.
5. Tuj post ricevo de manuskripto la ricevinto konfirmu al la forsendinto la ricevon.
6. La manuskriptoj esti kontrolataj de almenaŭ 2 personoj, el kiuj almenaŭ 1 ne apartenu al la nacia lingvo de la aŭtoro aŭ tradukinto.
7. Post la kontrolo de tiuj personoj, la estraro de la Literatura Komitato komparu la faritajn rimarkojn kaj eventuale decidu inter du diversaj konceptoj de la kontrolintoj kaj cetere zorgu pri la unueco en la verko.
8. La faritaj rimarkoj estu nur proponoj al aŭtoro aŭ tradukinto. Neniu ŝanĝo okazu sen aprobo de ĉi tiuj. Se la aŭtoro aŭ tradukinto persistas pri iu formo, kiun Lit. Komitato malaprobis, ĝi estu presata kun tiurilata rimarko de la Literatura Komitato (malantaŭe en la libro). Se la kvanto da tiaj formoj estas tro granda aŭ la formoj rekte kontraŭfundamentaj, la verko ne ricevu la aprobon de la Literatura Komitato.
9. La Literatura Komitato ricevu la duan presprovon de la kontrolita verko.
10. La kontrolo ampleksu gramatikon kaj stilon, sed ne la konformecon de la traduko al la originalo. Pri ĉi lasta la tradukinto restu plene responda. Nur ĉe dubo pri la ĝusteco de iu vorto, frazo au esprimo ĝi rilatu pri tio kun la tradukinto.
11. Se la kvanto da ŝanĝoj estas tioma, ke oni ne plu povas konsideri ĝin kiel laboron de la aŭtoro aŭ tradukinto, sed kiel de la Komitato, la Literatura Komitato ĉesigas kontrolon kaj redonos la manuskripton.
12. La kontrolintaj komitatanoj ricevu 1 ekzempleron de ĉiu kontrolita verko eldonita.
13. La kontrolado okazu senpage, se la verko estos eldonata de SAT aŭ de iu LEA-o. Por kontrolo de manuskripto eldonota de privata eldonisto, la prezo estu certa oblo de la vendprezo de unu ekzemplero.

Ĝia konsisto

La Literatura Komitato de SAT konsistas el A-membroj kaj B-membroj. A-membroj estas nur SAT-anoj ; ili solaj gvidas la Komitaton, proponas novajn membrojn kaj eksigojn al la P.K. de SAT. En konsento kun la O. K. ili elektas reprezentantojn de la SAT-movado por la Akademio Esperantista. B-membroj estas ne-SAT-anoj, kiuj pro siaj lingvaj kapabloj akveptas kunlabori en la Komitato.

Elekto de la membroj

Literatura Komitato kaj P.K. de SAT proponas kandidatojn. Ambaŭ devas interkonsenti, por ke la elekto validu. Eksigoj (pro perturbado, nelaborado k.s.) estu proponataj ambaŭflanke. P.K. findecidas.

La A-membroj elektas prezidanton kaj sekretarion inter si. Tiu elekto okazu interkonsente kun la P.K. de SAT.

La Literatura Komitato havas reprezentanton en la Ĝenerala Konsilantaro, konforme al sia karaktero de SAT-instanco.