Regularo de la Poresperanta Fako de SAT

La Poresperanta Fako de SAT estas organo de SAT (§8, D de la Statuto de SAT), kies regularo adoptita per voĉdono de la SAT-kongreso en Bratislavo (2004) estas la jena :

1. La Poresperanta Fako de SAT (poste "PF") agadas sub la ĝenerala direktado de la statutaj organoj de SAT. Informado kaj varbado plenumataj de la PF kaj celantaj la ĝeneralan publikon devas havi la aprobon de la Plenumkomitato.

2. La celoj de la PF estas :

a. informi pri Esperanto kaj varbi por SAT en regionoj kaj medioj ekster la atingopovo de la LEA-oj, tute aparte per la interreto ;

b. estigi kaj firmigi rilatojn kun interesitoj pri SAT kaj Esperanto, kaj helpi lernantojn de Esperanto, kiuj inklinas politike al SAT kaj troviĝas ekster la atingopovo de la LEA-oj ;

c. faciligi per tradukado, enretigo kaj aliaj rimedoj la interŝanĝon kaj komparadon de informaj kaj varbcelaj eldonaĵoj kaj tekstoj inter la LEA-oj kaj unuopaj SAT-membroj, kiuj okupiĝas pri poresperanta laboro ;

ĉ. faciligi ĝenerale la interŝanĝon de spertoj pri tiu poresperanta laboro kaj stimuli la debaton pri informstrategiaj konceptoj, cele al konstanta plibonigo de la poresperanta laboro plenumata en la tuta SAT-medio.

3. Ĉiu membro de SAT rajtas iĝi kunlaboranto de la PF per

a. aliĝo al ĝia interreta dissendolisto, aŭ

b. starigo de alimaniera regula kontakto kun ĝi.

4. La kunlaborantoj de la PF elektas sekretarion, kiu respondecas pri la rilatoj kun la Plenumkomitato kaj aliaj SAT-organoj. Ili rajtas laŭbezone elekti kromajn komisiitojn.

5. La kunlaborantoj de la PF organizas sian kunlaboron per

a. interreta dissendolisto,

b. ttt-ejo, kaj

c. eventuale decidotaj aliaj rimedoj.

6. La PF financas sin – kiom necese – per libervolaj donacoj.

7. Ŝanĝo de ĉi tiu Regularo eblas per 2/3-a plimulto de la donitaj voĉoj de PF-kunlaborantoj. Tiun decidon devas konfirmi la PK.