Solidareco kun la greka rezistado (petskribo)

PETSKRIBO

Solidareco kun la greka rezistado

La greka popolo estas en situacio de plenrajta defendo. Oni provas trudi al ĝi neelteneblajn politikojn de rigoreco. La sinsekvaj planoj ellaboritaj en Bruselo aŭ de la eŭropa Konsilantaro kaj prezentitaj laŭ pli malpli regulaj intertempoj kiel la sola rimedo por "savi" ĝin el la troŝuldiĝo kaj "savi" la eŭron ĉiufoje fiaskas. Ĉiam pli kaj pli submetante sin al la diktato de la financaj merkatoj, oni ne kuracas la malsanulon sed oni mortigas ĝin. Daŭrigo laŭ tiu vojo estas same senprudenta kaj danĝera.

Necesa estas vera plano de solidareco kun Grekio. Ĝi ankaŭ estas la sola savrimedo por la eŭro kaj la eŭropaj kunagantoj de Ateno. La Eŭropa centra banko (ECB) devas helpi reekigi la kreskon kaj la dungon en Grekio kaj ĉie alie, financante - je kvoto je kiu ĝi pruntodonas al bankoj, nome, je 1 % aŭ eĉ malpli - la ŝtatojn kaj iliajn publikajn servojn, tiel ebligante al ili eliri el sia dependeco de la financaj merkatoj kaj de iliaj uzuraj interezaj kvotoj.

Ĉie hodiaŭ la kresko reduktiĝas. Nova ekonomia krizo minacas la eŭran zonon. Demokratio estas piedpremata. Registaroj, kiel tiu de Ateno, ne estas voĉdone elektitaj sed estas nomumitaj. Burokrataj aeropagoj diktas sian leĝon al la voĉdone elektitaj asembleoj. Aŭtoritatismaj decidoj estas alprenitaj por perforti la popolajn rezistojn, kiuj ekstaras kontraŭ la dispremado je salajroj kaj sociaj protektoj.

La eŭropa konstruo ne transvivos post tiu antaŭenforkuro. La popoloj batalantaj kontraŭ la rigoreco estas pravaj. Ili bezonas nian tutan solidarecon.

Ni subtenas la ideon antaŭmetitan de ekonomiistoj, de agantoj de la socia movado kaj de la maldekstraj fortoj en Francio kaj en Eŭropunio por ke, per la reaĉeto je valorpaperoj de publika ŝuldo ĉe ilia eldono ECB rekte financu la ŝtatojn kaj iliajn publikajn servojn. Tio estus la sola rimedo por rompi la instigilojn de la spekulacio kontraŭ la publikaj ŝuldoj.

La diversaj kunagantoj de la eŭra zono devas havi la eblecon uzi la povon de ECB krei monon por financi la niatempajn sociajn, ekologiajn, energiajn, sanecajn ktp. bezonojn. La Eŭropa fonduso de financa stabileco establita de Eŭropunio devas esti transformita en eŭropan fonduson de socia kaj ekologia disvolvo kaj esti dediĉita al tiu celado. La rekapitaligo de la bankoj aŭ ilia naciigo devas esti kondiĉita al apartiga politiko de la kredito je la servo de tiu celado.

Eŭropo estas ĉe vojkurbiĝo. Gi povas eliri el la krizo nur se ĝi emancipiĝas el la diktaturo de la financaj merkatoj kaj kapabligas sin al komunigita socia, demokrata kaj ekologia progresigo.

Nomo kaj antaŭnomo - Adreso - Subskribo - Retadreso :

(El la franca gazeto "L’Humanité" de mardo 14-a de februaro 2012 esperantigis Pierre Lévy , levipesperanto ĉe yahoo.fr kiu laŭbezone resendos al la donita adreso la subskribojn senditajn al lia retadreso)

Reta fonto (franclingve) :
 http://www.humanite.fr/politique/gr...

Vidu ankaŭ (en esperanto) :
 http://www.ipernity.com/group/socia...