Jevsejeva (tri poemoj por infanoj)

Ludmila Jevsejeva
Tri poemoj

Infanoj desegnas

Desegni ŝatas ĉiuj infanoj,
Ĉu angloj, ĉu rusoj, aŭ ĉu japanoj...
Sci-vola okulo fiksas ĉion :
Domon, riveron, arbo-folion...
Estu nur kreto, krajono, papero,
Amikeco kaj Paco sur Tero !



Enigmo

Multajn pinglojn subpiceo
trovis Petro kaj Andreo.
Kiu perdis ?
Jen enigmo !
Eĉ, de spuroj mankas signo.
—Eble estis sub piceo
Erinaca tra-noktejo ?

Leontodo

Leontodo flava floris
en komenco de l’ somer’.
Or-kapeto brile oris
inter herbo, sur la ter’.

Pasis temp’. Petaloj velkis.
Kie restis la dekor’ ?
Sur flugiloj de la vento
Lanugete flugis for.

detajpis Dorothea Kaiser