Nova tutmonda raporto pri diskriminacio kontraŭ nereligiuloj

– Nova raporto ĉeftemigas la persekutadon de ateistoj
– Punjuraj procedoj pro blasfemio plimultiĝas konekse kun interkonaj retejoj

La Internacia Humanista kaj Etika Unio (IHEU) eldonis la unuan raporton, kiu temigas la manieron, laŭ kiu landoj tra la tuta mondo diskriminacias kontraŭ nereligiuloj. Freedom of Thought 2012 : A Global Report on Discrimination Against Humanists, Atheists and the Non-religious [Penslibereco 2012 : Tuttera raporto pri diskriminacio kontraŭ humanistoj, ateistoj kaj nereligiuloj] estis eldonita por festi la Tagon de Homaj Rajtoj, lundon, la 10-an de decembro.

Freedom of Thought 2012 traktas leĝojn, kiuj efikas al la konscienclibereco en 60 landoj, kaj listigas multnombrajn unuopajn kazojn, en kiuj ateistoj estis elmetitaj al punjuraj procedoj pro siaj kredoj en 2012. Ĝi raportas pri leĝoj, kiuj neas la ekzistorajton de ateistoj, limigas ilian liberon de kredo kaj sinesprimo, revokas ilian rajton je civitaneco, limigas ilian edziĝorajton, obstrukcas ilian aliron al publika lerneja instruado, malpermesas al ili plenumi publikan oficon, preventas ilian labordungiĝon por la ŝtato, krimigas ilian kritikadon kontraŭ la religio, kaj ekzekutas ilin pro forlaso de la religio de iliaj gepatroj.

La raporto ĉeftemigas krutan plimultiĝon de arestoj pro "blasfemio" en interkonaj retejoj ĉi-jare. En la antaŭaj tri jaroj estis nur tri tiaj kazoj, sed en 2012 pli ol dekduo da homoj en dek landoj estis jure persekutitaj pro "blasfemio" en Facebook aŭ Twitter, interalie :
En Indonezio, Alexander Aan estis malliberigita du kaj duonan jarojn pro afiŝaĵoj en Facebook pri ateismo.
En Tunizio, du junaj ateistoj, Jabeur Mejri kaj Ghazi Beji, esits kondamnitaj pasigi sep kaj duonan jarojn en malliberejo pro Facebook-afiŝaĵoj, kiujn oni taksis blasfemiaj.
En Turkio, la pianisto kaj ateisto Fazil Say frontas malliberiĝon pro "blasfemiaj" tviteraj pepaĵoj.
En Grekio, Phillipos Loizos kreis Facebook-paĝon primokantan la kredon de grekoj je mirakloj, kaj nun oni punakuzas lin pro insultado de religio.
En Egiptio, la 17-jara Gamal Abdou Massoud estis kondamnita je trijara malliberiĝo, kaj Bishoy Kamel estis malliberigita ses jarojn, ambaŭkaze pro afiŝado de "blasfemiaj" karikaturoj en Facebook.
La fondinto de Facebook-Ateistoj en Egiptio, Alber Saber, atendas pasigi tempon en malliberejo (oni kondamnos lin je puno la 12-an de decembro).

"Kiam la tekniko de la 21-a jarcento kolizias kun mezepokaj leĝoj pri blasfemio, okazas, ke ĝuste ateistoj vundiĝas, tiumaniere, ke pli multe da ili eniras malliberejon pro kundividado de siaj personaj kredoj pere de interkonaj retejoj", diris Matt Cherry, la redaktoro de la raporto. "Tra la tuta mondo, la reakcia impulso puni novajn ideojn, aŭ en kelkaj kazoj nur la plej simplan esprimon de nekredo, reokazadas ĉiam denove. Ni havas eĉ kazon en Tunizio, ĉe kiu ĵurnalisto estis arestita pro sia aŭdaco kritiki proponitan leĝon kontraŭ blasfemio !"

La Speciala Raportisto de la Unuiĝintaj Nacioj pri Libereco de Religio aŭ Kredo, Profesoro Heiner Bielefeldt, bonvenigis la esploron. En antaŭparolo por la raporto, Bielefeldt notas, ke ofte ekzistas "malmulte da konscio", ke internaciaj traktatoj pri homaj rajtoj komunikas, ke konscienclibereco aplikiĝas en egala grado al "ateistoj, humanistoj kaj liberpensantoj kaj al iliaj konvinkoj, praktikoj kaj organizaĵoj. Pro tio mi ĝojegas, ke unuafoje la komunumo de humanistoj produktis tutteran raporton pri diskriminacio kontraŭ ateistoj. Mi esperas, ke ĉiu, kiu okupiĝas pri libereco de religio aŭ kredo, donos al ĝi zorgan konsideron."

Notoj

La raporto Freedom of Thought 2012 elŝuteblas ĉi tie :
http://www.iheu.org/files/IHEU Freedom of Thought 2012.pdf

La Internacia Humanista kaj Etika Unio (IHEU) estas la tutmonda ombrela organizaĵo, kiu kunigas pli ol 100 humanistajn, ateistajn, raciistajn, sekularistajn kaj liberpensajn organizaĵojn el 40 landoj.

Por havi pli da informoj, kontaktu :

Bob Churchill, +44 207 636 4797, comms@iheu.org

Or Matt Cherry, +1 518 632 1040, matt@iheu.org