SAT-anoj atestas

"SAT celas per konstanta uzado de racie elpensita lingvo kaj ĝia mondskala aplikado, helpadi al la kreado de racie pensantaj spiritoj, kapablaj bone kompari, ĝuste kompreni kaj prijuĝi ideojn, tezojn, tendencojn, kaj sekve kapablaj elekti memstare la vojon, kiun ili opinias plej rekta, aŭ plej irebla por la liberigo de sia klaso kaj forkonduko de la homaro al kiel eble plej alta ŝtupo de civilizo kaj kulturo."

Jen bela ideo, opinias la skeptikaj hezitemuloj, sed kio pri ĝia praktika realiĝo ? Jen kelkaj respondoj el diversaj mondopartoj.

Kial vi aliĝis al SAT ?

Jam la komenca ideo estis lerni Esperanton por komuniki kun laboristoj/salajruloj mondvaste. Do, kiam mi pere de malnova SAT-anino aŭdis pri SAT mi tuj aliĝis ĉar la ideoj de SAT, interŝanĝi ideojn kaj kompari tezojn plene respondas al miaj ideoj pri monda asocio.

Kial vi plu restas en SAT (subkomprenite : malgraŭ eventualaj elreviĝoj...) ?

Montriĝas ke en SAT oni trovas informon kiu ne estas facile havebla pere de la amas-komunikiloj. Kio ankaŭ estas ĝena afero estas ke la informo de la amas-komunikiloj ĉiam venas de la samaj grandaj novaĵaj agentejoj kiuj filtras laŭ la potenco al kiu ili apartenas (plejparte reakcia). Avantaĝo de SAT estas ke oni ricevas informon de diversaj lokoj en la mondo rekte de homoj kiuj vivas en la regiono kie la ’novaĵo’ okazas aŭ de homoj kiuj havas apartan intereson en certaj temoj. Se la membroj plene utiligas la gravan servon de Sennaciulo (la revuo de SAT) ili povas havi informon pri laboristaj/salajrulaj problemoj kiujn ili ne akiras pere de la ’normalaj informkanaloj’. (propra sperto en grava evento el mia vivo)

Kion SAT alportis, kaj daŭre alportas al vi ?

Fakte tre stranga demando. Ĉu asocio devas alporti ion ? Ĉu ne estas tiel ke la membroj de asocio alportu ion al la asocio ? Asocio vivas aŭ mortas pro la iniciatemo kaj agademo de la membroj. La plej grava afero kiun SAT alportas estas la grandega avantaĝo lerni pensi internacie, se oni kapablas malfermi la spiriton. Alia afero kiu tre gravas estis la fakto, ke sen monda solidareco, nek SAT nek iu ajn alia monda asocio povas funkcii. Ĉi tiu estas grava ĉar SAT estas asocio kiu defendas interalie la rajtojn de ĉiuj salajruloj. Se oni bone analizas la statuton kaj idearo de SAT oni konkludas ke la nuna ideo de la Alternativa Tutmondismo (monda forumo, ktp) jam vivas en la idearo de SAT ek de 1921. Alia mondo eblas, ne nur pere de parolado de universala lingvo Esperanto, sed pere de aplikado de socialaj/socialismaj ideoj (filozofia koncepto kiu defendas egalrajtecon de ĉiuj homoj). Agadi en SAT signifas agadi por pli sociala, pli egalrajta, pli bona mondo. Oni povas diri ke oni estas progresema kaj stari ĉe la linio. Oni povas esti progresema kaj unuiĝi en rondo de progresemuloj, tiel plifortigante la necesan potencon. La elekton devas fari ĉiu individuo.

Jakvo Schram

Kial vi aliĝis al SAT ?

Mi (re)aliĝis al SAT kiam mi komprenis ke, estante E-organizaĵo en kiu ariĝas plejparte socialismemaj (en senco politikdoktrina) esperantistoj, SAT per siaj celoj kaj idealoj tre parencas al kunordigata de mi universalhumanisma Ligo "Humanitas" kaj ĝiaj celoj kaj idealoj. Ja socialismo kiel politika doktrino sendube havas multajn komunajn idealojn kun universalhumanista mond- kaj vivkoncepto, tiomgrade ke oni eble rajtas konsideri ĝin unu el politikdoktrinaj branĉoj de humanismo kaj la humanismon - fono el kiu elkreskis socialismo kiel unu el ĝiaj politikdoktrinaj branĉoj. Do, ne mirinde estas ke iuj membroj de SAT membras en Ligo "Humanitas" (fakte ek de la fondiĝo de la ligo) kaj ke iuj membroj de Ligo "Humanitas", inkluzive min, kun plezuro membras en SAT (au almenau aliĝis au re-aliĝis al SAT) post fakta starigo de kunlaboraj rilatoj inter Ligo "Humanitas" kaj SAT surkampe de fondiĝo de Humanista Frakcio de SAT)

Kial vi plu restas en SAT (subkomprenite : malgraŭ eventualaj elreviĝoj...) ?

Mi restos membro de SAT ĝis kiam SAT restos malfermita al sia universalhumanisma idea fono, ĝis kiam mi sentos min en SAT bonvena kiel humanisto plej sincere simpatianta socialisman politikan doktrinon (ja humanismo ne estas politika doktrino kaj humanistoj - en sia politika engaĝiĝo - simpatias au neniun speciale aŭ, tamen, tiun au alian politikan doktrinon kiun konkreta adepto de humanismo trovas plej parenca al lia/ŝia humanismeco, ĉe kio oni devas konfesi ke fakte plej ofte temas pri t.n. maldekstraj politikaj doktrinoj). Mi mem estas membro de neniu politika partio, sed mi ĉiam partoprenas balotadon kaj donas mian voĉon al tiu politika opcio kiu (en konkreta momento kaj en mia regiono) plej koincidas kun mia humanismaj idealoj. Se mi (r)estus membro de nur unu E-organizaĵo, mi preferus (r)esti membro de SAT, kun konsidero de la supra limigo.

Kion SAT alportis, kaj daŭre alportas al vi ?

Plej sinceran plezuron ke ja estas ankaŭ esperantistoj-idealistoj en senco pli aŭ malpli universalhumanismeca (ne nur esperantistoj el tiuj aŭ aliaj pure pragmataj kialoj aŭ kun tiuj aŭ aliaj malvastaj mondkonceptaj horizontoj) kaj E-organizaĵo funkcianta ne nur tre demokratie, sed eĉ, laŭ mi, iom tro demokratie - pro kio mi iomete bedaŭras, konsiderante tion malhelpo al ebla kaj de mi plej sincere dezirata laŭeble pli alta efikeco de SAT, sed tamen mi tion alte taksas kaj respektas).

Mato Ŝpekuljak

Kial vi aliĝis al SAT ?

Preskaŭ hazarde. Serĉante Esperanto-parolantojn, mi surmetis la verdan stelon. En la pariza metroo, nekonata neesperantisto (eble junulargastejano ? Mi ne bone memoras), kiun mi poste neniam plu revidis, alparolis min. Eksciinte pri mia serĉo, li konsilis al mi viziton al la SAT-sidejo, kie mi tion trovis, kion mi serĉis. Tio okazis en aprilo 1946.

Kial vi plu restas en SAT (subkomprenite : malgraŭ eventualaj elreviĝoj...) ?

Pro la idea enhavo de la statuto de SAT (subkomprenate : malgraŭ ĉio, pro nekuracebla obstino, kiun mi pro sama obstino plu nomas "celkonscio", kiu donis al mi faman "pakiderman haŭton").

Kion SAT alportis, kaj daŭre alportas al vi ?

Amason da zorgoj kaj taskoj, kiu ĉiam kreskas ; sed ankaŭ vivkialon. Pli precize sed resume : deziron akiri la kapablon "elekti memstare la vojon, ktp..." Tio kondukis min multe pli malproksimen, ol mi dekomence atendis, sur vojo kun horizonto ĉiam pli malproksima.

Petro Levi

Kial vi aliĝis al SAT ?

Mi aliĝis precipe por trovi eksterfranciajn gekorespondulojn.

Kial vi plu restas en SAT (subkomprenite : malgraŭ eventualaj elreviĝoj...) ?

Mi ne tro ŝatas malordojn, kiel konfliktojn inter samideanoj sed esperas trovi solvojn por daŭre partopreni la diskutojn.

Kion SAT alportis, kaj daŭre alportas al vi ?

Diversecon de opinioj, ekz. inaj, aŭ samseksaj, informojn pri sociaj rilatoj en samopinigrupoj, ktp. Aldona komento : Reference "statuton", mi ne multe konas "klasajn" ideojn, plue celojn. Ĉu tio estus la diverseco de enspezo au salajro, kiu orientigus, eĉ ordigus la socian ordon ? Sed kiel reguligi tian aferon, kiam ne ekzistas alia ilo ol Biblio ("amu unu la alian") ? Prefereble mi uzus edukadon, kiel alfabetigado por ĉiuj, antaŭ ĉio. Alia demando : ĉu daure ekzistas laboristoj, kiam mi vidas, ke la socia celo de edukado estas almenaŭ abiturienteco ? Ĉu laboristoj estas abiturientuloj ? Certe ne, kvankam... Kiel aspektus la laborista "biblio" ? Ĉu referenco al Markso sufiĉas ? Mi ŝatas literaturon, do emas instigi al la beleco, simpleco kaj komunikiveco de la uzata lingvo. Ĉu la "Manifesto" estas literature ekzempla ?

Petro Chibleur

Kial vi aliĝis al SAT ?

Ĉar mi konis ĉarman anarkiiston kiu estis ĝia reprezentanto en la lando, kie mi loĝas, kaj pro familia historio mi simpatias al anarkiismo.

Kial vi plu restas en SAT (subkomprenite : malgraŭ eventualaj elreviĝoj...) ?

Pardonu, mi ne komprenis la vorton "elreviĝo". Mi konsideras SAT la nura forumo (krom la Radikala Partio) por pritrakti politikajn aferojn, ĉar la E-movado ne multe konsideras la sociajn kaj politikajn problemojn. Krome, ili apogis la samideanon Sekvoja, komdamnita je morto en Usono, kaj mi simpatias al tiu helpo.

Kion SAT alportis, kaj daŭre alportas al vi ?

Informadon kaj diskutadon pri sociaj kaj politikaj problemoj, en Esperanto.

Jozefo Lunazzi

Kial vi aliĝis al SAT ?

Pro tio ke mi estas klaskonscia laboristo do devas aliĝi al asocio kreita por helpi laboristojn lerni pli bone kompreni sian situacion, jen per komparado jen per malkovro de koncernaj ideoj kaj teorioj. Mi opinias scion grava antaŭkondiĉo por ĝusta agado kaj forigo/minimumigo de antaŭjuĝoj.

Kial vi plu restas en SAT (subkomprenite : malgraŭ eventualaj elreviĝoj...) ?

Pro ties kleriga rolo, konvinko pri ties utilo -do vivkapablo- kaj, laste sed ne malĉefe, pro ĉiama raviĝo antaŭ ties mirinda interna demokratio.

Kion SAT alportis, kaj daŭre alportas al vi ?

Mi malkovris, ĉefe dank’al la broŝurservo, politikajn ideojn en Brazilo tute ne alireblajn. Anarĥiismo ekzemple nur la lastan jardekon oni sufiĉe facile trovas. Ĉu facile ? Nur en grandaj urboj.

SAT plu kunportas al mi la senton de libera loko kie ĉiu, eĉ se foje akre, polemikige, rajtas E-lingve esprimiĝi pri politikaj temoj.

Luiz De Oliveira Coelho

el la SAGO, julio 2004, en kiu ne aperis pro miskompreno la kontribuo de Ŝpekuljak