sat kulturo
serĉado :
 .  ĉefa paĝo  .  indekso  .  Kontakto  .  ĝisdatigita ĵaŭdon la 31an de decembro 2020 . ĝis nun estas 1352 tekstoj










Petro LEVI

Post la franca referendumo...



La francaj civitanoj certemeritas gratulon, kun konsidero pri la frakasa oficiala propagando,
kiu superŝutis nin dum multaj monatoj. Tamen triumfi
estus ne singarde, ĉar tiu venko ne lasas al ni facilan
situacion.


Mi ne pretendas nun fari kompletan analizon, kiu devus esti
objekto de debato. Tamen kelkaj punktoj estas notindaj.


Ĉiuj defendantoj de la nea respondo kritikis la "sendependecon"
de la Centraj Bankoj kaj de la Centra Eŭropa Banko. Mi metas
citilojn, ĉar tiuj bankoj estas institucie sendependaj de ĉia
demokrata povo, sed ne de la tutmonda financa "merkato" !


Oni diris ke tiun "sendependecon" de la eŭropa banka sistemo
volis "la germanoj" pro la sperto pri Hitler, kiu uzis la
germanan bankan sistemon kiel ilon de sia politiko. Tio pensigas
pri naiva persono de romano de Grafino de Segur (naskita
Rostopŝin), kiu ĵetis sin en riveron por ŝirmi sin kontraŭ
pluvo : ja estas konata la subteno, kiun Hitler kaj lia sistemo
ricevis de la tutmonda financistaro, precipe en sia supreniro
al la povo.


Alia interesa konstato estas, ke praktike neniu defendanto de
la nea respondo batalis kontraŭ la ideo de eŭropa konstruo : la
demando, "ĉu por aŭ kontraŭ unuigita Eŭropo" estas ekstertema.
Oni ne rifuzas unuigitan Eŭropon, sed tian formon de konstruo,
konkretigitan per la proponita teksto.


Notindas, ke reprezentantoj de ĉiuj francaj politikaj tavoloj
esprimiĝis favore al nea respondo, kaj ne nur ekstremoj,
kontraŭe al la diroj de oficiala propaganda martelado.


En la tendaro de la jesa respondo troviĝis, apud la ekstreme
dekstra partio de la nunaj ŝtatprezidanto kaj registaro, ne nur
aliaj dekstraj partioj, kiel UDF, defendanto de sociliberala
politiko, sed ankaŭ partioj, kiuj kutime situas principe
maldekstre, kiel la Socialista Partio kaj la "maldekstraj Verduloj"
("ekologiistoj"). Okazis disigo de la Socialista Partio, kies
kongresintaj aktivuloj esprimiĝis demokrate por jesa respondo,
sed kies parto de gvidantoj kaj plimulto de
simpatiantoj-voĉdonantoj voĉdonigis aŭ voĉdonis por la nea
respondo.


Problemoj estas la evidenta malbona volo de la prezidanto Ŝirak
kaj de lia registaro akcepti la demokratan verdikton, kaj ĉefe la
peza heredaĵo de maldemokrate truditaj antaŭaj traktatoj : la
demokrate venkitaj politikistoj pretendas, ke la traktatoj, kies
kompilado konsistas la III-an parton de la rifuzita teksto, restas
aplikeblaj malgraŭ la okulfrapa malaprobo. La aliaj registaroj, kiuj
jam ratifis tiun "konstitucion", kompreneble subtenas tiun vidpunkton
kaj esprimas sian funebron pri la franca voĉdono. Ĉi tiu ankaŭ
povas esti esperiga signalo por aliaj popoloj, precipe tiuj, kiujn
oni ne konsultis por decidi anstataŭ ili.


Kia ajn estas la rezulto de la voĉdono, ni nun devas kune
fronti nefacilan situacion. Jesa rezulto estus lasinta alian sed
ankaŭ nefacilan situacion. La historia disvolviĝo ne estas
blanka aŭ nigra sed neniam finiĝas.


laŭ mesaĝo el "SAT-diskuto", la 30an de majo 2005, responde al gratulmesaĝoj de alilandaj kamaradoj post la rezulto de la franca balotado

Sama rubriko :


puce Vinko Markov : Eŭropa Konstitucia Traktato - ĉu granda aŭ malgranda trompaĵo ?

puce Post la franca referendumo...

puce Referendumo en Francio pri Eŭropa Konstitucia Traktato (EKT)

puce LA FRANCA NEO GEOGRAFIE KAJ SOCIOLOGIE

puce Eŭropo, konstitucio por nenio

puce Antaŭ la referendumo : konstrui ali-eŭropisman neon

puce Ĉu tio koncernas nur la eŭropanojn ?

puce Eŭropa Konstitucio - sklavema aŭ liberiga ?

puce Petro Levi : Kiujn sociajn atingojn, ankoraŭ aperantaj en naciaj konstitucioj, endanĝerigas la projekto pri Eŭropa Konstitucio ?

puce La eŭropa konstitucio kaj la maldekstro

puce POR DEMOKRATIA KAJ SOCIALA REFONDADO DE LA EŬROPA UNIO

puce Projekto de eŭropa konstitucio (traduko en Esperanto)

puce La tasko estas armado

puce Petro Levi : Ĉefaj kritikoj al la projekto

::: Ĉiuj :::



Supren