Deklaracio de la 98a SAT-Kongreso

La 98-a Kongreso de Sennacieca Asocio Tutmonda (SAT), kunveninta en Greziljono inter la 9-a kaj la 16-a de aŭgusto 2025 :
– rekomendas, ke SAT profiliĝu kiel organizaĵo de maldekstraj esperantistoj, en kiu videblas la strebo instrumentigi Esperanton, interalie :

• por la emancipiĝo de la tutmonda laborista klaso kaj ĉiuj aliaj dominataj kaj subpremataj sociaj kategorioj,
• por progresiva redukto de socia malegaleco ene de landoj kaj mondnivele,
• por decida tutmonde kunordigita agado kontraŭ la ekologia difektiĝo de la planedo, tute aparte reage je la klimata krizo,
• por progreso ĝis mondo, en kiu kapitalismo malaperas kaj homekspluatado ne eblas ;
• kontraŭ aŭtoritatismaj, eĉ faŝismaj tendencoj en multaj landoj,
• kontraŭ, imperiismo, imperiismaj militoj, naciismo, rasismo, ksenofobio, nativismo kaj mistraktado de migrantoj en la unuopaj landoj,
• kontraŭ seksismo, kapablismo, speciismo, GLAT-fobio ;

– rekomendas klerigcelan agadon por tiuj celoj kaj kontraŭ tendenco konduki la Asocion al stato de ĝeneralcela politika debatejo, en kiu dekstraj kaj kontraŭemancipaj pozicioj aperas kvazaŭ samrange diskutindaj kiel la supre nomitaj ;
– pledas por la retiriĝo de ĉiuj imperiismaj kaj ekspansiismaj landoj el teritorioj, kiujn ili senrajte okupacias, sekvota de adekvataj reparacioj – de Gazao ĝis Ukrainio, okupacio estas krimo !
– kondamnas imperiismon sen rezervoj motivitaj de kliniĝo al tiu aŭ alia mondpolitika tendaro ;
– pledas por sistemo de interŝtataj rilatoj baziĝanta sur la internacia juro kaj kiel eble plej reprezentaj mondnivelaj institucioj ;
– konstatas kun indigno la genocidan karakteron de la israela milito kontraŭ Gazao ;
– postulas tujajn militĉesojn en Ukrainio, Palestino, Jemeno, Sudano, Sirio, Kongolando, k.a. ;
– koncerne la kruelan kaj senfinan militon en Kivuo (D. R. Kongolando), firme kondamnas perfortaĵojn kaj krimojn kontraŭ la popolo fare de la diversaj ribeluloj, interalie M23 kaj ADF Nalu, de najbaraj landoj kaj de firmaoj, kiuj avide kaptas la riĉecon de la grundo ; subtenas agadojn por denunci tiun militon kaj por repacigi Kivuon ;
– proponas, ke la buĝetoj por gardi pacon (blukaskuloj kaj aliaj internaciaj rimedoj) multe pliiĝu ;
– proponas ke atomarmiloj estu malpermesitaj en ĉiuj landoj ; rememorigas pri tiamaj kaj daŭraj viktimoj de la bombado en Hiroŝimo kaj Nagasako, okazinta antaŭ 80 jaroj, kaj ĝi subtenas ĉiujn agadojn por paco kaj kontraŭ armiloj ;
– postulas, ke kaj la nunaj terloĝantoj kaj niaj posteuloj ĝuu rajton dece kaj sekure vivi, por kio necesas zorgi kiel eble plej baldaŭ pri la rebonstatigo de ĉio, kio vivas ;
– apogas la senpagajn magazenojn kaj aliajn iniciatojn por tiuj, kiuj malfacile povas libere aĉeti.