Matkowski : Al niaj malamikoj !

Idiotoj !
Vi, kiuj portas noktopotojn,
Brasikojn, glanojn kaj la napojn
Anstataŭ kapojn !
Mi nun krivokas kun obstin‘
Ekaŭdu min !!

Ekaŭdu min, vi – antikristoj,
Vi, kiuj nin esperantistojn,
En nom‘ de viaj dioj, kristoj...
Nomadis iam masonistoj
Kaj klaĉis kontraŭ ni sen fin‘,
Ekaŭdu min !!!

Frenezulaĉoj !!
Vi, majstroj de mensogaj klaĉoj
Vipantaj nin per stulto-skurĝoj,
Ke kvazaŭ ni nun iĝis burĝoj,
Ke ni – iamaj komunistoj
Skribataj sur nigraj listoj,

Socidanĝeraj ruĝspiritoj
Estiĝis nun kosmopolitoj
Kun sia propra kateĥism‘
En servo al kapitalism‘
Ho vi – viktimoj de l‘ Destin‘ –
Ekaŭdu min !!

Kaj vi – "Karulo" mister Stiller",
Vi – anglofil‘ kaj diskutanto
Pri la "sentaug’ " de Esperanto,
Pro ĝia "mank" de stilistiko,
Ho vi – laiko sen logiko
Ho vi – hom-vermoj, homo-kuloj,
Vi – kiuj nin en klaĉoj banas,
Malice mokas kaj rikanas,
Vi, kiuj nin per koto ŝmiras
Kaj ĉiam volas kaj deziras
Ekvidi nin sub gilotin‘ –
Ekaŭdu min !!

Mi jam ne plu kun vi diskutos,
Sed kiel vi samklaĉos, sputos...
Rikanos, mokos kaj priridos,
kun rim‘ kaj vorto vin insidos,
Ĉar mi vin traktas homo-nuloj,
Ne diskutantoj, sed klaĉuloj,
Klaĉuloj, kiujn mi ne flatos,
Sed senpardone vipos, batos
Per rimo-manoj, vort-piedoj...
Laŭ viaj propraj klaĉ-rimedoj,
Mi vin bategos ĝis moment‘,
En kiu muto kaj silent‘
Al vi, ho tipoj klaĉ-malplaĉaj,
Sigelos viajn buŝojn aĉajn,
Ĝis krevos via klaĉ-maŝin ‘ !
Nu, maŝinistoj !

GARDU vin !