Bukowski : Kandidatovizaĝo sur balota afiŝo

Charles Bukowski
Kandidatovizaĝo
sur balota afiŝo

Jen li :
ne tre ofte malbonfartas postebrie,
ne tre ofte kverelas kun inoj,
ne tre ofte havas platan aŭtopneŭon,
neniam pensis pri suicido,
ne estis pli ofte ol trifoje ĉe dentkuracisto,
neniam malfruiĝis ĉe manĝo,
neniam estis en prizono,
neniam enamiĝis,
havas
sep parojn da ŝuoj,
filon en universitato,
aŭton ne pli aĝan ol jaro,
asekurpolicojn,
brile verdan gazonon,
rubujojn, kies kovriloj
perfekte fermiĝas.

Tiun oni elektos.